Genesis 22

Îtogo Abara-ámma Maqmá Aónaraiye

1Yaímma kana yátámakitana, Îtogo Abara-ámma maqmá aónaraiye. Îtogo “Abara-ámma” timámítana,

Abara-ám téna, “Maa-maúne” tiráiye.

 2Îtogo téna, “Enánimma kímora arupikémmó akaín íyápó awîqme Móréya aukapaq winaq, móra (1) anuma arátena enánimma ikámma agaamá ôba umátikao.”

 3Maí nókáápáqá Abara-ám itó-uréna, ôbamo í-íráámá yaímma atáqma kebóqya otikoní ámúraq kémarena, wení kaya (2) máyáí nákáráq ánikomma wemá yiwíkaiye. Yeráwáqá maréta Îtogo timáyímí marukaq urae. 4Kaya (2) wáágá yátámakitana, Abara-ám wonaeti márúqá aónama nékaq yukaiye. 5“Kaya (2) mayaí nákáráq maakáq pááqya otikaraq maero,” Abara-ám timáyíkaraiye. “Kerátá Îtogokaq mérapaq wuréka monoqá mó-tiyákátuweka yauwéqma keráwátópaq yéyúye.”

 6Abara-ám agaamá ôba umákai iraama mamá Áitikimma kábakena, wemá iraa-áakaraq púmá mataíye. Abo maákama móraitéta uráye. 7Áitiki téna, “Ketibo?” titana.

“Owe ketáaniko?” Abara-ám anónná uráiye.

Áitiki téna, “Iraa-áakaraq iraamáq maíbo, ánibo nákaraq áráa tipitipi agaamá ôbamo umákaima maiyo?”

 8Abara-ám anónna uráiye, “Ketáaniko, Îtogoma wenamáríq móra (1) áráa tipitipi ôbamo agaamá amímá timini-karatae.” Abo maakama móraitéta maréta kóuraye.

 9Abo yenákámá Îtogomo timáyíkai marukaq uréta Abara-ám yáaré taróqumá iraamaá áakumá ámúra makaíye. Wemá Áitikimma ánna ai-yayaka ataumá yaareraq iraa-ámúraq makaiye. 10Abo wemá ayáámma áarumma púmá maténa ánikomma ikamínéna uráiye. 11Abo wíyôpake Yawe Îtogoní énítóreko áayama téna, “Ábárá-ám! Ábárá-ám!”

Abara-am anónna uráiye, “Ké-maúne” tiráiye.

 12“Íma min-íyápómá awekema amiyo, ánekuqma mórayatari-uwo (1),” tiráiye. “Íbêqa kemá aónáúnama emá Îtogoní áaqa ikatiqé mináítábá emá íma enánimma kímora iyapo yáátorane.”

 13Abara-ám waéqma aónama yúwáimma awai-típítípí karanóbaq ituwena wení kómuraq maitana aónaraiye. Wemá uréna koma tipitípi maména ánikoní márúqa mamá agaamá óba ámíkaiye. 14Abo Abara-ám mi márúqá “Yawe Îtogo timíní marure” tiráiye. Íbe kanama “Yawe Îtogota timíní anuwe” tiráiye.

 15Abo Yawe Îtogoní énítóreko wíyôpake Abara-ámma yauweréna kayataoriq-umá (2) áayaraiye. 16“Kemá áaraimma akoqná aimma timamune, “Yawe Îtogo mirá téna tiye. “Emó kímora iyapo ímo yátóránna áitaba, 17Kemá áarai-nuramma anó amuramuqa eqkáráq ení iyápó-anna mamá taíbariq íníye abayáákáq wiyóká éta nonáwábaqa kekébára ínóe. Ení iyápó-anna namurotí márúqa yíkamma yabiyínóe. 18Emó ketáámo waaránna áitaba, ení iyápó annarake máte marabaqa maa márábímmá (amurámuq marainoe).”

 19Ániye téna, Abara-ám wení mayaí wayukate yauwéqma móraiteta maréta Bétíbaq kourae. Abara-ám Bétíbaq máqe uráiye.

Naqaní Ánimare, Náqa Ábárá-ámni Ábákowe

20Yaímma kana yáwitana Abara-ámma timámíkaiye, “Mírkáma wekáráq iyápó anowae, enábáqa Náqakake wemá inamaíráwáqá yíkátukaiye. 21Útíma-ma áqnáekowe, Bútíma-ma ábákowe, Kémúeri (Árámuni abowae). 22Kététi, Áyo, Bírítáti, Yítírábu-garaq Bétúeriye.” 23Bétúeri Árébékani abowá aúraitana, Mirkáma mi eítiqa (8) inamaíráwáqá Abara-ámuni abako Náqakake yíkáraiye. 24Wení anaékaq (2) anaqa Reúmae, wegárá inamaí yíkáraiye. Yetí yíwíqa. Tápae, Gáqámue, Táqátigaraq mákae.

New Testament
Copyright information for USA